Оңтүстік Кореяда өрт сөндіру кезінде тікұшақ апатқа ұшырады

Оңтүстік Кореяның Ыйсон уезінде өрт сөндіру кезінде тікұшақ апатқа ұшырап, ұшқышы қаза тапты, деп хабарлайды 24kz.

Жалпы құрбандар саны 18 адамға жеткен. Қызыл жалыннан елдің оңтүстік-шығыс бөлігі орасан зардап шекті. Тілсіз жаумен күреске 128 тікұшақ пен 9 мыңға жуық өрт сөндіруші, сарбаз және мемлекеттік қызметкер тартылған. Ормандағы өрт тіпті ЮНЕСКО-ның Дүниежүзілік мұра тізіміндегі Хахве ауылына қауіп төндіріп тұр. Осы сәтке дейін салынғанына мың жылдан асқан бірнеше тарихи буддистік ғибадатхана жойылды. Билік 150 мың тұрғынды қауіпсіз жерге көшіруге бұйрық берген.

Естеріңізге сала кетейік, тілсіз жау осыдан 5 күн бұрын тұтанған. Алапат өрт болып жатқан Кёнсан-Пукто провинциясы ел астанасы Сеулден небәрі 180 шақырымда орналасқан. Аймақта 15 мың гектардан астам жасыл желек күлге айналды.