Ертең 9 өңірде дабыл жүйесі іске қосылады

6-7 наурызда еліміздің солтүстік, шығыс және орталық өңірлерінде «Көктем-2025» республикалық командалық-штабтық оқу-жаттығудың 2-ші кезеңі өтеді, деп хабарлайды Egemen.kz.

Оқу-жаттығу жиынында су тасқыны кезеңінде атқарылуы тиіс іс-қимылдар пысықталып, құралдар дайындалады.

Оқу үйлестіру және жетекшілік ету жөніндегі республикалық штаб Қостанайда орналасады. Оқу-жаттығу шеңберінде екі күн бойы Астана қаласында, Ақмола, Шығыс Қазақстан, Қостанай, Қарағанды, Павлодар, Солтүстік Қазақстан, Абай және Ұлытау облыстарында профилактикалық іс-шаралар өткізіледі.

Сондай-ақ, аумақтық деңгейдегі құлақтандыру жүйесінің дайындығын тексеру мақсатында еліміздің 9 өңірінде 6 наурыз сағат 11.00-де барлық дыбыстық электр дабылдары қосылады.

Осыған орай Төтенше жағдайлар министрлігі азаматтарды тыныштық сақтап, үрейге бой алдырмауға шақырды.