Наурыз мейрамындағы қоныстой

Наурыз мейрамы қарсаңында Қарағанды облысында жүздеген отбасы жаңа пәтер кілтін алды. Игілікті іс әлі де жалғасын табады. Жаңа баспанаға 389 отбасы қоныстанады.

Балқашта «Наурызнама» онкүндігі шеңберіндегі Қайырымдылық күні аясында көп балалы аналарға, аз қамтылған отбасыларға және мүмкіндігі шектеулі жандарға 15 жаңа пәтер берілді.

Саранда 110 отбасыға кілт табыс етілді. Олардың ішінде жетім балалар, көп балалы отбасылар және әлеуметтік осал топ өкілдері бар. Бұл пәтерлер мемлекеттік бағдарлама бойынша құрылыс салушыдан сатып алынды.

– Наурызда игілікпен бөлісу, сыйлықтар жасау дәстүрге айналды. Осындай мереке қарсаңында біз үшін маңызды сыйлық – пәтер кілтін алғанымыздың ерекше мәні бар, – дейді Саран қаласында тұратын жалғыз басты ана Мөлдір Салықова.

Жаңа пәтердің кілтін тапсыру алдағы күндері де жалғасады. Қарағандыда 19 наурызда 180 отбасы қоныс тойын тойлайды, 20 наурызда Бұқар жырау ауданының Доскей ауылында 60 отбасы пәтер кілтін алады, 21 наурызда тағы 24 отбасы Нұра ауданында жаңа баспанаға ие болады.

Қарағанды облысы