29 LRT қызметкері Қытайда тағлымдамадан өтеді

LRT-ны басқару, техникалық қызмет көрсету, жөндеуге қатысты 29 қызметкер оқытылған. Астанада өткен оқытудың бірінші кезеңінде қатысушылар теориялық білім алып, тестілеуден сәтті өткен, деп жазады Egemen.kz.

Қазір білім алушылар екінші модульді оқуға кіріскен. білім алушылар осы кезеңді аяқтағаннан кейін Қытайға барып, практикалық сабақтар мен тағылымдамадан өтеді.

Сабақтарды Тяньцзинь метрополитені мен Чжэнчжоу теміржол кәсіптік-техникалық университетінің сарапшылары жүргізеді.

«City Transportation Systems» ЖШС мәліметінше, 2024 жылғы қарашадан 2025 жылғы қаңтарға дейін бағдарламаға қатысуға 140 адам өтінім білдірген. Оның ішінде 29 үміткер іріктелген. Олардың қатарында Астана қаласының 15 тұрғыны, сондай-ақ Алматы, Тараз, Есіл, Павлодар, Көкшетау, Арқалық, Қарағанды, Екібастұз, Қызылорда және Абай өңірінің өкілдері бар.

Оқыту бағдарламасында қалалық теміржол көлігінің негіздерін, оның жүйелерінің компоненттерін және төтенше жағдайлар кезіндегі әрекет алгоритмдерін оқытып-үйрету қамтылған.