Астана әкімдігі автобус апатынан зардап шеккен Алуаның отбасына 4 бөлмелі пәтер сыйлады

Бұл туралы қала әкімдігінің баспасөз қызметі хабарлады, деп жазады inbusiness.kz сайты.

Елордада болған автобус апатынан зардап шеккен Алуаның отбасына Астана қаласының әкімдігі жеке демеушімен бірлесіп жаңа пәтер сыйлады. Мемлекет басшысының тапсырмасы аясында отбасыға қазан айында пайдалануға берілетін жаңа тұрғын үй кешенінен төрт бөлмелі пәтердің сертификаты табысталды.

"Құрылыс компаниясы пәтерді жөндеп, қажетті жиһазбен жабдықтауға көмектесетін болады. Бұған дейін отбасыға көрсетілетін басқа да қолдау шаралары туралы айтылған еді", – делінген ресми мәлімдемеде.

Еске сала кетейік, елордада қоғамдық көлік бағанаға соғылып, бірнеше адам жарақат алған болатын. Олардың арасында кәмелетке толмаған Алуа да бар. Кейін оның аяғы кесілгені хабарланды. Баланың отбасына шамамен 30 миллион теңге көлемінде өтемақы берілетіні де белгілі болды.