Блогерлердің басына бұлт үйірілді: Заңсыз табыс тәркіленетін болды

Енді әлеуметтік желідегі заңсыз лотереялар қатаң бақылауда болады, деп хабарлайды Skifnews .kz ақпарат порталы.

Мәжіліс депутаты Ерлан Сайыров әлеуметтік желілерде заңсыз лотереялардың көбеюіне алаңдаушылық білдіріп, Үкіметке сауал жолдаған еді. Депутат атағандай, инфлюенсерлер туристік пакеттер, жылжымайтын мүлік, автокөлік және сәнді тауарларды ұтысқа қойып, заңсыз лотереялар өткізіп жүр.

Үкімет басшысының орынбасары – Ұлттық экономика министрі Серік Жұманғарин қандай шаралар қабылданып жатқанын түсіндірді.

Халыққа түсіндіру жұмыстары жүргізіліп жатыр. Заңсыз лотереялар мен алаяқтық әрекеттерді болдырмау мақсатында шаралар қабылдануда. Министрлік Instagram, TikTok, Meta платформаларымен бірлесіп жұмыс істейді – ақпараттық алаңды алаяқтықтан тазарту және заң бұзушылықтарды жедел анықтау үшін интернет кеңістігі тәулік бойы бақыланады, — делінген оның жауабында.

Жыл басынан бері:

• ✔ 1 870 интернет-алаяқтық фактісі тіркелді, оның 389-ы әлеуметтік желілерде.
• ✔ 1 480 сайт пен сілтемеге қолжетімділік шектелді.
• ✔ Интернет-казиноға қатысты 8 616 заң бұзушылық анықталды, оның 6 399-ы әлеуметтік желілерде.

Заңсыз лотерея ұйымдастырушыларға қандай жаза қарастырылған?

100-ден 2000 АЕК-ке дейін айыппұл (393 200 – 7 864 000 теңге).

Жиналған заңсыз табыс тәркіленеді.

2024 жылдың ақпанынан бері 113 адам әкімшілік жауапкершілікке тартылып, 50 млн теңгеден астам айыппұл салынды.

Қазақстанда лотерея ұйымдастыруға тек ресми операторларға рұқсат етілген. Қазіргі таңда бұл құқық «Сәтті Жұлдыз» АҚ-на тиесілі.

Үкімет бұл мәселеге ерекше назар аударып, бақылауды күшейтіп жатыр.