Ақтөбеде жағымсыз иістің ошағы анықталды

Ақтөбеліктер бірнеше жылдан бері шаһарды жайлаған жағымсыз иіске шағымданып келді . Бұған дейін мамандар қанша тырысқанымен ол иістің қайдан шығып жатқанын анықтай алмаған еді.

Табиғатты қорғау прокуратурасы, облыстық тұтынушылар құқықтарын қорғау Департаментінің мамандары мен экологтар қаланы түгел аралап, зертханалық жұмыстар жүргізді. Нәтижесінде жағымсыз иістің ошағы қала шетінде орналасқан шаруашылықтардың бірі деген қорытындыға келді. Серіктестік құс фабрикасынан көп көлемде тауық саңғырығын алып, органикалық тыңайтқыш ретінде 120 гектар жерге қолданған. Шаруа қожалығының басшысына бұл аумақты пайдаланбау керектігі ескертіліп, тыңайтқышты елді мекен аумағынан жыраққа апарып тастау туралы нұсқама берілді.

Ермек Қуанов, облыстық экология Департаментінің басшысы:

41-ші разъезд аумағында орналасқан құс фабрикасы да біздің назарымыздан тыс қалмады. Оларға ауаны тазалайтын озонация технологиясын қолдану жөнінде талап қойылды. Олар екі айда қондырғыны орнатуды міндеттеріне алып отыр.

Жақсыбек Кемал