Биыл 112 жаңа мектеп пайдалануға беріледі

Елде жыл соңына дейін 112 жаңа форматтағы мектеп пайдалануға берілмек. Бұл туралы Оқу-ағарту министрлігі мәлімдеді .

Қазір Мемлекет басшысының тапсырмасымен «Келешек мектептері» ұлттық жобасы сәтті жүзеге асып жатыр. Мәселен 2024-2025 оқу жылында 254 мың орындық 105 білім ордасы бой көтерген.

Былтыр Астана қаласында 16, Шымкентте 11, Алматы шаһарында 7 «Келешек мектебі» ашылды. Халқы тығыз орналасқан Түркістан облысында 13, Ақмола мен Алматы өңірінде 9 мектеп, Ақтөбеде 2, Шығыс Қазақстан мен Қызылорда облыстарында 5 білім ордасы іске қосылды. Жамбыл, Қарағанды, Қостанай және Маңғыстау облыстарында 4 оқу ошағы пайдалануға берілсе, Абай, Батыс Қазақстан және Атырау аймақтарында 3 мектеп оқушыларды қабылдады. Ал Жетісу, Ұлытау және Солтүстік Қазақстан өңірлерінде 1 мектептен ашылды.