Қазақстанда малды сәйкестендіру жүйесі Еуропадағыдай болуы мүмкін

Астанада ауыл шаруашылығы саласын дамытуға арналған дөңгелек үстел өтті.

Қазақстан Еуроодақ талаптарына сай болатын үй жануарларын сәйкестендірудің бірыңғай орталықтандырылған жүйеге көшуді жоспарлап отыр. Бұл туралы Ауыл шаруашылығы вице-министрі Ермек Кенжеханұлы айтты, деп хабарлайды inbusiness.kz сайты "ҚазАқпарат" агенттігіне сілтеме жасап.

Сөзінше, министрлік ветеринариялық жүйе мен биологиялық қауіпсіздікті дамытуға ерекше назар аударады.

"Біріккен Ұлттар Ұйымының азық-түлік және ауыл шаруашылығы ұйымы біздің сұрауымызбен ауыл шаруашылығы жануарларын сәйкестендірудің ұлттық жүйесіне баға беруде техникалық қолдау көрсетті, ол үшін алғыс айтамыз. Сонымен қатар халықаралық ұйым ескірген платформаны жаңғырту бойынша "Бірыңғай орталықтандырылған жүйе" форматына көшіру бойынша құнды ұсыныстар берді, бұл оның Еуроодақ талаптарына сәйкестігін қамтамасыз етеді", – деді Ермек Кенжеханұлы.

Вице-министр елдегі ветеринариялық препараттар саласына да цифрлық бақылау жүйесін енгізу керек екенін жеткізді.

Айтуынша, БҰҰ-ның азық-түлік және ауыл шаруашылығы ұйымы бюросымен бірлесіп, дүниежүзілік сауда ұйымының сауда стандарттары мен даму қоры (STDF) аясында гранттық қаржыландыру алу үшін өтінім әзірленіп, жіберілді.