Биыл футболдан клубтар арасындағы әлем чемпионаты АҚШ-та өтеді

15 маусым мен 13 шілде аралығында АҚШ-та жалауы желбірейтін футболдан клубтық әлем чемпионатының жүлде қоры 1 миллиард АҚШ долларын құрайды.

Жоғарыдағы ақпарат ФИФА-ның ресми сайтында жарияланды. Аталған доп додасында бас жүлдені олжалаған команда 125 миллионды иеленеді. Қалған қаражатты қатысушы 31 клуб алған орындарына байланысты бөліседі. Бұл бәсекелерді АҚШ-тың бірнеше қаласы қабылдайды. Ал финалдық сайыс Нью-Джерси штатына қарасты Ист-Резерфорд қаласындағы 82 500 көрерменге есептелген «Мет-Лайф» стадионында ұйымдастырылады.

АҚШ-тағы доп додасында Еуропаның – 12, Оңтүстік Американың – 6, Солтүстік Американың – 4, Азияның – 4, Африканың – 4 және Мұхит жағалауының – 1 командасы бақ сынайды.