Маңғыстау облысындағы кен орнында газ-су қоспасы ауаға тарады

№57 ұңғымадан газ-су қоспасы өртсіз түрде ауаға шыққан.

2025 жылғы 6 маусымда Маңғыстау облысы Бейнеу ауданындағы "Толқын" кен орнында төтенше жағдай тіркелді, деп жазады inbusiness.kz сайты.

Облыстық Төтенше жағдайлар департаментінің мәліметінше, апат "Varro Operating Group" ЖШС-на тиесілі ұңғымада орын алған. Зардап шеккендер жоқ.

Қазіргі уақытта ұңғыманың трубалық кеңістігінен газ-су қоспасының шығуы жалғасып жатыр. Апат салдарын жою үшін оқиға орнына ТЖД-ның 32 маманы, 10 техника бірлігі және бір ұшқышсыз ұшу аппараты жұмылдырылды.

"Қауіпсіздік шаралары күшейтілді. Жағдай тұрақты бақылауда. Қосымша ақпарат берілетін болады", – деп хабарлады облыстық ТЖД.