Ақтөбе әкімінің орынбасары Әлия Молдағұловалармен кездесті

Ақтөбе облысында Кеңес Одағының батыры Әлия Молдағұлованың 100 жылдық мерейтойына арналған шаралар жалғасуда, деп хабарлайды El.kz интернет порталы .

С.Жиенбаев атындағы облыстық жасөспірімдер кітапханасында Кеңес Одағының Батыры Әлия Молдағұлованың 100 жылдық мерейтойы аясында тағылымды шара ұйымдастырылды. Шара аясында облыс әкімінің орынбасары Жолдас Батырхан өңірдегі Әлия Молдағұлова есімді қыз-келіншектер, 2025 жылы дүниеге келген Әлия есімді сәбилер және олардың аналарымен кездесті.

Әкімдіктегілер бұл батыр қыздың есімін ұрпақ жадында сақтау мақсатында ұйымдастырылған игі бастама екенін атап өтті.

Кездесу барысында қатысушыларға мерейтойлық кәдесыйлар табыс етіліп, батыр бабалар ерлігі туралы тағылымды әңгімелер өрбіді. Әлия Молдағұлова есімінің ұрпаққа өнеге, ерлік пен отансүйгіштіктің символы ретінде маңыздылығы ерекше атап өтілді.