Түркістан облысында жүк көлігі мен тепловоз соқтығысты: жолаушылар пойызы кешігіп жатыр

Апат Қызылсай-Шымкент темір жол учаскесінде болған .

8 тамыз күні сағат 04:30-да Қызылсай-Шымкент аралығындағы күзетілетін теміржол өткелінде HOWO маркалы жүк көлігі маневрлік тепловозбен соқтығысты, деп жазады inbusiness.kz сайты.

"Қазақстан темір жолы" ҰК" АҚ баспасөз қызметінің мәліметінше, жол-көлік оқиғасы пойыздардың жүру кестесіне әсер еткен.

Болжам бойынша, жүк көлігінің жүргізушісі жол қозғалысы ережелерін бұзып, жақындап келе жатқан құрам алдында өткелге шығып кеткен. Қайтыс болғандар жоқ, жүргізуші ауруханаға жеткізілді.

Апат салдарынан 3 жолаушылар пойызының қозғалысы уақытша тоқтатылды. Сағат 07:18-де учаскеде қозғалыс толық қалпына келтірілді.