Мәсімовтің үйінен табылған самурай қылышы аукционда сатылды

Қайтарылған активтерді басқаратын компания бұрын тәркіленген сәнді мүліктерді – сағаттар, зергерлік бұйымдар мен түрлі аксессуарларды сатылымға шығарды.

Аукционға жалпы құны 520 миллион теңгеден асатын 42 сәнді зат қойылғанымен, олардың көбі сатып алушыларын таппады, деп жазады inbusiness.kz сайты.

Тек бір зат – ҰҚК-ның бұрынғы басшысы Кәрім Мәсімовтің жекежайынан алынған "қынабындағы самурай қылышы" 540 мың теңгеге сатылды.

Бұған дейін де тәркіленген қылыштар мен коллекциялық монеталар аукционда 10 миллион теңгеге дейін бағаланған болатын.

Айта кетейік, биыл Мәсімовтің Астанадағы 1,8 миллиард теңгеге бағаланған зәулім сарайы бірнеше рет сатылымға шығарылып, кейін Оқу-ағарту министрлігіне берілген еді.