Чемпиондар лигасы: "Қайрат" пен "Семейдің" 1/8 финалдағы қарсыластары анықталды

Швейцарияның Ньон қаласында футзалдан УЕФА Чемпиондар лигасының 1/8 финалының жеребесі тартылды.

Алматылық "Қайратқа" бельгиялық "Спортинг-Андерлехт", ал "Семейге" польшалық "Пяст Гливице" қарсылас атанды.

1/8 финалдың алғашқы матчтары 24 қарашада, ал қарымта кездесулері 5 желтоқсанда өтеді.

Жеңімпаз болған сегіз команда екі матчтық ширек финалға жолдама алады. Бұл кезең келесі жылдың 23 ақпанында және 6 наурызында өтеді.

Турнирдің финалдық кезеңі 8 және 10 мамырда Италияның Пезаро қаласында ұйымдастырылады.

Айта кетейік, футзалдан Чемпиондар лигасының негізгі кезеңінде "Қайрат" Португалияның "Спортинг", Косовоның "Приштина" және Хорватияның "Ново Вриеме" клубтарымен бір топта болып, алты ұпай жинап, екінші орын алған еді.

Ал "Семей" үш ұпаймен Испанияның "Пальма", Францияның "Этуаль" және Чехияның "Хрудим" клубтарымен бір топта үшінші орынға ие болды.