Әлем чемпионатының алтынына 4 қазақ боксшысы таласады

Дубайда (БАӘ) IBA өткізіп жатқан 2025 жылғы дүбірлі доданың финалистері анықталды.

Ақтық сындағы бәсекелер 13 желтоқсан күні өтеді, деп хабарлайды inbusiness.kz сайты.

Финалистер саны бойынша Ресей құрамасы алдына қара салмады. Ол елдің 12 спортшысы алтыннан дәмелі. Сол секілді, Өзбекстанның 6 боксшысы финалға шықса, Қазақстаннан 4 былғары қолғап шебері жеңімпаз атануға тырысып көреді. Әзербайжан, Қырғызстан, Тәжікстан және Беларусь елдері жалғыз боксшысына сенім артады.

Қазақстандық боксшылардың финалдағы қарсыласы:

1. 54 келі. Сәкен Бибосынов – Вячеслав Рогозин (Ресей);
2. 57 келі. Оразбек Асылқұлов – Хусравхон Рахимов (Тәжікстан);
3. 71 келі. Абылайхан Жүсіпов – Сергей Колденков (Ресей);
4. 75 келі. Сабыржан Аққалықов – Исмаил Муцольгов (Ресей).

Жартылай финалда Сәкен Бибосынов непалдық Тапу Чандра Бахадурдан айналып өтсе, Оразбек Асылқұлов ресейлік Андрей Пегливанянды 5:0 есебімен жеңді.

Абылайхан Жүсіпов Қырғызстан боксшысы Ихтияр Нишоновтан 5:0 есебімен айласын асырса, Сабыржан Аққалықов өзбекстандық Фазлиддин Эркинбоев жекпе-жектен бас тартқан соң 2025 жылғы әлем чемпионатының финалына қиналмай өтті.