Биыл Қазақстан тарихының жаңа көптомдығы басылып шығады

Мұндай сүйінші жаңалықты Ғылым және жоғары білім министрі Ұлттық құрылтайдың 4-отырысы аясында айтты.

Академиялық басылымды әзірлеуге 300-ден аса шетелдік және отандық тарихшы жұмылдырылған, деп жазады inbusiness.kz сайты.

Саясат Нұрбектің айтуынша, Қазақстан тарихының жаңа академиялық көптомдығына әртүрлі сала бойынша 350-ге жуық еңбек енеді.

– Құрылтай алаңында Мемлекет басшысы жаңа жылнамалық 7 томды, ұлттық тарихымыз жөнінде үлкен еңбекті жазу туралы тапсырма берген еді. Биыл осы жұмысты аяқтауды жоспарлап отырмыз, – деді ол.

Академиялық басылымды әзірлеуге 5 ғылыми институт, еліміздің 250-ден және шетелдің 60-тан астам тарихшы ғалымы қатысқан.

Көптомдыққа 40-тан аса археологиялық зерттеу материалдары, тарих, археология және этнография салалары бойынша 300-ге жуық еңбек енеді. Оны дайындау барысында халықаралық форумдардың, көптеген ғылыми конференцияның, дөңгелек үстелдер мен әдістемелік семинарлардың аясында арнайы секциялар ұйымдастырылған. Осы іс-шараларда ғылыми зерттеулердің нәтижелері тексерілген, сондай-ақ ғалымдардан, сарапшылардан және мамандардан ұсыныстар алынған.

Осыған дейін Мемлекеттік кеңесші Ерлан Қарин Алматы қаласындағы Ә.Марғұлан атындағы Археология институтында "Қазақстан тарихы: ежелгі дәуірден бүгінге дейін" атты жаңа академиялық басылымды әзірлеп жатқан жетекші ғалымдармен кездескені отандық БАҚ-та жазылған еді.