Павлодарда бала терезеден құлап кетті

Павлодарда алты жастағы бала 6-қабаттағы терезеден құлап көз жұмды. Қазір полиция тексеріс жүргізіп жатыр, — деп хабарлайды Massaget.kz тілшісі.

Павлодар облысы Полиция департаментінің баспасөз қызметі мәліметінше, қайғылы оқиға 2 маусымда болған.

"2019 жылы туған бала алтыншы қабаттың терезесінен құлап кеткен. Өкінішке қарай, бала алған жарақатынан көз жұмды. Балкон әйнектен жасалған. Пәтерде анасы мен әпкесі болған, анасы ас үй шаруасымен айналысып жүрген", – деп жазылған хабарламада.

Полиция қазақстандықтарға үндеу жасады

Кейінгі уақытта мұндай оқиға жиілегендіктен, полиция кішкентай балаларды ашық терезесі немесе балконы бар бөлмеде қараусыз қалдырмауға шақырды.

Көп жағдайда балалардың құлауына себеп – дұрыс бекітілмеген торлар немесе ашық балкон. Балалар торға сүйеніп, құлап кетуі мүмкін.

Ата-аналар мына ережелерді есте ұстауға тиіс:

• арнайы қорғаныссыз торларды пайдаланбаңыз;
• терезелерге бала өзі аша алмайтындай құлыптар немесе кілтпен жабылатын тұтқалар орнатыңыз;
• бала терезе немесе балкон жанында ойнап жүрсе, оны қараусыз қалдырмаңыз;
• мұқият бақылаңыз.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!