«5 жылдан бері сәби күткен»: Шуда жүкті келіншектің денесін туыстары аурухананың жертөлесінен тапқан

Шу қаласының тұрғындары журналистерге дәрігерлер науқастың өлімін жасыруға тырысты деп мәлімдеді, деп хабарлайды Skifnews.kz ақпарат порталы.

Тұрғындардың айтуынша, ерлі-зайыпты 5 жылдан астам уақыт бойы сәбилі болуды күткен. Былтыр жасанды ұрықтандырудың нәтижесінде келіншек жүкті болған.

Ресми емес ақпарат бойынша, 5 наурыз күні әйел ауырып, жүктіліктің 34-ші аптасында Шу қалалық көпсалалы ауруханасына жатқызылған. 9 наурыз күні кешке оның жағдайы күрт нашарлап, комаға түседі. Ал 10 наурызда дәрігерлер ота арқылы іштегі өліп қалған баланы алып тастады. Сол кезден бастап келіншек жансақтау бөлімінде болды. Ал 2 күннен кейін есін жимастан қайтыс болған. Марқұмның туыстары әлеуметтік желілерде шу шығарды. Олар келіншектің өлімнің алдын ала себебі деп берілген «көптеген органдардың жеткіліксіздігі және мидың ісінуі» диагнозымен келіспейді.

Жергілікті тұрғындар және журналистер бұл істі «жабулы қазан күйінде» қалдырмай, жария етті. Туыстарының айтуынша, күйеуі әйелін ауруханадан іздеген, алайда оның ісініп, иістене бастаған денесін аурухананың техникалық бөлмелерінің бірінен тапқан.

Әлеуметтік желіде Шу қалалық көпсалалы ауруханасы «бұл жарияланған ақпарат жалған және науқас 22 наурыз күні сәтсіз реанимациядан кейін жедел жүрек-қан тамырлары жеткіліксіздігіне байланысты қайтыс болды» деп жауап берді.

— Шу көпсалалы аудандық орталық ауруханасында ана өліміне байланысты тергеу шаралары жүргізіліп жатыр. Жамбыл облысы әкімдігінің денсаулық сақтау басқармасында осы факті бойынша жұмыс тобы құрылды. ҚР Денсаулық сақтау министрлігі Медициналық және фармацевтикалық бақылау комитетінің Жамбыл облысы бойынша департаменті осыған орай тексеру жүргізеді. Тексеру нәтижелері мен сараптама қорытындысы кейін жарияланады, — деп жауап берді денсаулық сақтау басқармасында.

Жамбыл облыстық полиция департаменті медицина қызметкерінің кәсіби міндеттерін тиісінше орындамауынан абайсызда адамның денсаулығына ауыр зиян келтіру және өліміне әкеп соқтыру бабы бойынша сотқа дейінгі тергеу жүргізді. Қажетті сараптама жасау үшін мәйіт Таразға жіберілді.