Ақмола облысында бес сүт фермасы ашылды

Агроөнеркәсіптік кешенді жаңғыртуға бағытталған мемлекеттік бағдарламалар мен инвестициялық жобалардың саны жыл сайын артып келеді.

Өткен жылдан бері облыста 5 ірі сүт-тауар фермасы іске қосылды. Жалпы, бұл кешендер 5 мыңнан астам ірі қара малға арналған. Жаңа жобалар сүт өндірісінің көлемін ұлғайтып қана қоймай, Ақмола облысын елдегі жетекші мал шаруашылығы орталықтарының біріне айналдыруға ықпал етеді, деп жазады inbusiness.kz сайты.

Биыл қаңтар айында өңірде Орталық Азияда теңдесі жоқ ірі жоба – ТОО АФ "Родина" жүзеге асырған ең үлкен сауын каруселі іске қосылды. Оның құрылысына 3 миллиард теңге инвестиция салынды. Бұл заманауи жүйенің өңірде баламасы жоқ. Айналмалы алаң бір уақытта 80 сиырды қамтиды, бұл қысқа мерзімде 2000 басқа дейін саууға мүмкіндік беріп, өндірістің тиімділігін айтарлықтай арттырады.

"Бұл жоба – заманауи технологиялардың ауыл шаруашылығын дамытудағы жарқын үлгі. Ол саланың тиімділігін, өнім сапасын және өндіріс көлемін айтарлықтай арттыруға көмектеседі. Биыл біз 1200 басқа арналған тағы екі сүт фермасының құрылысын аяқтаймыз. Бұл тауарлы сүт өндірісін 40 мың тоннаға көбейтуге мүмкіндік береді, яғни қазіргі көрсеткіштен 1,5 есе артық", – деп атап өтті Ақмола облысының әкімі Марат Ахметжанов.