Банктер жарты жылда 1,6 трлн теңге пайда тапты

Елдегі екінші деңгейлі банктер 2025 жылдың қаңтар-шілде аралығында 1,6 трлн теңге таза пайдаға шықты. Ұлттық банктің мәліметінше, бұл өткен жылдың сәйкес кезеңінен 18,1%-ға немесе 252,5 млрд теңгеге көп, деп жазады Egemen.kz.

Шілде айы банк секторындағы ең табысты ай болды. Бір ғана осы айдың қорытындысы бойынша банктердің таза пайдасы 262 млрд теңгені құрады. Бұл – жыл басынан бергі рекордтық көрсеткіш әрі өткен жылдың шілдесімен салыстырғанда 13%-ға жоғары.

Ай сайынғы табыс динамикасы: • қаңтар – 228,4 млрд тг • ақпан – 220,3 млрд тг • наурыз – 215,1 млрд тг • сәуір – 240,5 млрд тг • мамыр – 238,6 млрд тг • маусым – 235,7 млрд тг.

Маусымда жарияланған жартыжылдық есепке сәйкес, табыс көлемі бойынша көш бастап тұрған банк – Halyk Bank. Оның жартыжылдық таза пайдасы 473,9 млрд теңгеге жеткен. Одан кейінгі орында Kaspi Bank – 265 млрд теңге, үшінші сатыда – Банк ЦентрКредит (137,4 млрд теңге).

Қазір елде 22 банк жұмыс істейді. Жыл ортасында қаржы секторында бірқатар өзгерістер болды: маусым айында бұрынғы микроқаржы ұйымы банк лицензиясын алып, BNK Commercial Bank атауымен жұмысын бастады. Ал тамыздың ортасында тағы бір ірі микроқаржы ұйымы – KMF ресми түрде KMF Банкке айналды.

Сарапшылардың айтуынша, банктердің табысы несие портфелінің өсуімен, сондай-ақ халықтың тұтынушылық несиелерге сұранысының артуымен байланысты. Бұл тренд жыл соңына дейін сақталуы мүмкін.