Өзара іс-қимылға серпін беретін серіктестік

Қазақстан Премьер-министрінің орынбасары – Сыртқы істер министрі Мұрат Нұртілеу Астанаға алғашқы ресми сапарымен келген Арменияның Сыртқы істер министрі Арарат Мирзоянмен кездесті .

Тараптар қазақ-армян қаты­настарының кең ауқымды мә­селелерін талқылады. Атап айтқанда, екі ел арасындағы сая­си, сауда-экономикалық және мәдени-гуманитарлық өзара іс-қимылдың басым бағыттары, сондай-ақ биылға арналған жоғары деңгейдегі іс-шаралар кестесі қарастырылды. Достық пен өзара тиімді ынтымақтастық негізінде екіжақты серіктестікті тереңдетуге мән берілді. Тарап­тар ниетінің іс жүзіндегі көрінісі Ар­менияның Қарағанды мен Ақтөбедегі құрметті консул­дарының кеңселерін ашу болды.

«Армения – Қазақстанның Оңтүстік Кавказдағы сенімді сая­си және сауда-экономика­лық серіктесі және қазақ-армян байланыстары еш қиындықсыз, сындарлы көзқараспен дамуда және бір-бірінің мүдделерін ес­керуге дайын. Мен екі халық­тың игілігі үшін барлық уағдалас­тықты іске асыру мақсатында ең тығыз өзара іс-қимылға да­йын екенімді білдіремін», деді М.Нұртілеу.

Екі елдің бизнес-топтары­ның іскерлік байланыстарды да­мытуға қатысуының маңызы аталып өтті. Бүгінгі таңда Арме­нияда қазақстандық капитал­дың қатысуымен 100-ден аса кәсіпорын, ал Қазақстанда 430-дан аса армян компаниясы тіркелген.

Армения СІМ басшысы өткен жыл біздің мемлекеттер арасындағы екіжақты қарым-қатынас тарихындағы маңызды кезең болғанын мәлімдеді. Ол жоғары деңгейдегі сапарларға, сондай-ақ көптеген бірлескен іс-шараға толы болғанын атап өтті.

«Бұл әртүрлі саладағы өзара іс-қимылға қажетті серпін берді. Мемлекеттеріміз егемен­дік пен тәуелсіздікті нығай­туға, сондай-ақ транзит­тік әлеуетті арттыруға және ұлт­тық экономикаларды жаңғыр­туға ұмтылуда біртұтас екенін байқатты. Мұның бәрі серік­тес­тік қарым-қатынасты кеңейту үшін берік негіз жасайды. Ереван мен Астана халықара­лық және өңірлік күн тәртібін­дегі негізгі мәселелер бойынша жиі сәйкес немесе ұқсас ұстанымдарға ие», деді А.Мирзоян.

Тараптар инвестициялық байланыстарды одан әрі нығай­туға жәрдемдесуге уағда­ласты. Армян экономикасына қазақстандық капитал салым­дарының жалпы көлемі 56 млн доллардан асады.

Мәдени-гуманитарлық ын­ты­­мақ­тастықтың да мазмұн­ды күн тәртібі аталып өтті. Мем­ле­кет басшыларының қатысуы­мен өткен жылы Қазақстанда Арменияның мәдениет күндері өтті. Биыл Қазақстанның Арме­ниядағы мәдениет күндері мәдени алмасудың оң тәжірибесін жалғастырады.