Нарықтан өз орнын тапқан

Мемлекет отандық өндірушіні қолда­уға әрдайым басымдық беріп келеді. Салығын тұрақты төлеп, табысын еселеп отырған жергілікті компанияның бірі – «VIP Service 17» ЖШС өнімдерін нарыққа ұял­май шы­ғаруға, күмәнданбай сатып алуға болады.

Шымкент қаласында орналасқан кәсіпорын бір жыл ішінде 180 мың орындық, 10 млн тіс щеткасын, 6 млн иіс сабын, 3 млн ұстара өндіріпті. 1 млрд 200 млн теңге инвестиция құйылған кәсіпорынның жабдықтары түгелдей жаңа әрі заманауи.

Кәсіпорын іске қосылған сәттен бастап бірқатар маңызды шара жүзеге асырылды. Өндірістік жаб­дық­тар толықтай орнатылып, айналымға түс­кен­ше еркін жетерлік шикізат сатып алынды. Шикізатты толық дерлік Қытай елінен әкеледі. Жаңа зауыт болған соң, қызметкерлерді арнайы дайындықтан өткеріп, қайта оқыту тиянақталды. Әр өнімнің тартымды болуын қамтамасыз ету мақсатында тұтынушы талабына сай ұнамды әрі қолайлы өнім дизайны әзірленді.

«Зауыттың орнын сатып алып, құрылысын толық бітіргенше өзімнің 800 млн теңгеден аса қара­жатым жұмсалды. Төрт цехтың жабдықтарын әкеліп орнатуға 500 млн теңге қарастырылды. Оның 170 млн теңгесін өз жанымыздан құйып, қалған 330 млн теңгені «Даму қоры» өтеді. Қазір кәсіпорында 20 адам жұмыс істейді. Орташа еңбекақы – 200 мың теңге», дейді кәсіпорын директоры Данияр Әбдікәрім.

Тауардың басы – «Ариана» сабыны. Ол – уақыт сынағынан өткен, көптеген тұтынушының сенімі мен мойындауына ие болған өнім. Таңдалған ингредиенттер, заманауи өндіріс технологиялары және алма мен құлпынайдың нәзік хош иісі жұмсақ әрі тиімді тазартады.

«Сабын құрамында натрий стеараты, пропиленгликоль, натрий лауретсульфаты, натрий лаураты, глицерин, натрий хлориді, динатрий, хош иістендіргіш композициясы, натрий лауретсульфосукцинаты, динатрий ЭДТА, титаний диоксиді, акрил сополимері мен ментол бар. Салмағы 100 грамм сабын кесегі ұзақ уақыт пайдалануға жеткілікті. «Ариана Алма» иіс сабыны жұмсақ әрі жеңіл көбік түзіп, жағымды хош иісімен тазалық пен сергектік сезімін сыйлайды», дейді техник Азамат Әбдірасылов.

Ал мұндағы орындықтар поликарбонаттан жасалған. Мөлдір, түссіз орындықтарды үй жағ­дайында да, коммерциялық мақсатта да қол­да­нуға болады. Нәзік әрленген еденді қорғау мақ­са­тында орындық аяқтары арнайы ұштықтармен жаб­­дық­тал­ған. Су өткізбейді және сіңірмейді, сондай-ақ сарғайып, түрі бұзылмайды. Оңайлықпен сына қоймайды», деді екінші техник Мамырбек Тұрсын.

Оның сөзінше, орындық толық жиналған күйде жеткізіледі. Жинауға ыңғайлы әрі ультракүлгін сәу­ле­ден қорғалған.

Маман «Dalida» тіс щеткасының да ерекшелігіне тоқталды. Мысалы, орташа қаттылықтағы қыл­шық­тар тіс бетіндегі дақтарды 84%-ға дейін жоятын көрінеді. Ал нейлон қылшықтары бүкіл пайдалану мерзімінде өз түсін сақтайды.

Кәсіпорын басшылығының алдағы уақытқа жос­пары ауқымды. Тек оңтүстік өңірмен ғана шектеліп қалмай, өнімін еліміздің барлық аймағына таратуға құлықты. Көп ұзамай көрші елдердің нарығына шығуды да көздеп жүр. Бұған өнім сапасы мен зауыт әлеуеті кепіл.